Las crespèras

Entà 30 crespèras

Ingredients :

• 250g de haria
• 1 culhera a sopa d’òli o ua nòga de burre honut
• ½ litre de lèit ( o ¼ l d’aiga et ¼ l de lèit)
• 3 ou 4 ueus segon la talha
• 2 culheras de sucre en podra
• 1 pechic de sau
• Perhum :
• 1 culhera a sopa d’aiga de flor d’irangèr
• 1 culhera a sopa de ròm o de pastis

Preparacion :
Versar la haria dens un saladèr e copar los ueus dessús. Hornir lo pechic de sau, lo sucre, lo perhum e l’òli (qu’empacha las crespèras de gahar). Quan tot ei plan mesclat, versar, petit a petit la lèit en tojant dinc a obtiéner ua pasta ontuosa, shens borrolhs. Deishar pausar un moment.

Cueita :
Hicar ua petita gaha de pasta dens la padèra en tot dar penent ad’aquera dens tots los sens de tau faiçon la pasta qu’arrecobreishia tot lo hons. Còser d’un costat, har lo virolet. Saupicar de sucre, rotlar o plegar en esvendalh.

Astúcia :
Se la purmèra crespèra ei tròp espessa, rectificar la consisténcia de la pasta en tornant hornir drin d’aiga tà obtiéner crespèras mei finas.

Los crespèths

Tà 3 dotzenas. Quan e s’i hicam que’n hèm !

Ingredients :

• 2250g de haria
• 6/7 ueus
• 150g de burre
• ¼ litre d’aiga
• 1 citron (mensonjas de pèth) o 1 baston de vanilha (pas los dus au còp)
• 1 culherada de sopa de ròm o de Ricard
• 1 culherada de sopa de sucre
• 1 sarada de sau
• 1 saquet de lhevami Alsacian

Preparacion de la pasta :
Har cauhar aiga ; hicà’i lo burre a hóner, ajustà’i la pèth de citron, lo ròm, la sau, lo sucre vanilhat… Quan boreish e grameja l’aiga, tirar las mensonjas de citron e la vanilha e barrejar, sobte, la haria sancèra. Dab ua culhera de husta, virar virogosament dinc a obtiéner ua pasta lissa e shens borrolhs.
Suu huec doç, tribalhar la pasta quasi 10mn dinc a que lo hons de la caishòla e vàdia leugèrament sablós. Deishar enhredir la pasta. Quan e s’i pòd tocar shens cremà’s, hicà’i un ueu totas las 2 o 3 mn. La pasta que vad hèra lissa.

Cueita :
Dab ua culhera trempada prumèr dens l’òli o lo greish de còser, préner ua nòga de pasta e har-la eslissar dens la fridera. Hicar-ne autant qui lo vaishèth en pòd càber. Ne cau pas que’s tòquen. Los crespèths que còsen d’un costat puish que hèn capirona ; au cap de un quart d’òra que son cueits. Tirà’us dab ua passadera. Saupicar de sucre shens retienguda.

Astuça :
Se non voletz pas crespèths tròp bèths ne cau pas deishar pausar la pasta. Se lo greish o l’òli son tròp cauts, quan hètz eslissar las nògas de pasta tà dehens, aquestas que son sasidas a l’exterior e ne pòden pas mei estirà’s tà prabar.

Las mervelhas

Entà 6 personas

Ingredients :

• 500g de haria
• 50g de sucre vanilhat
• 1 pechic de sau
• un raspat de pèth de citron
• 3 culheras de ròm o de flor d’irangèr
• 5 ueus
• 50g de burre
• 1 saquet de lhevami

Preparacion :
Versar la haria dens un saladèr e har un putz. Hicar los ueus, lo sucre, lo pechic de sau, e lo burre juste honut. Mesclar un moment. Tornar hornir lo ròm, lo raspat de pèth de citron, lo lhevami, lo sucre vanilhat. Prestir lavetz un gran moment dinc a obtiéner ua pasta sopla, maserada, qui non gaha pas mei aus dits ; autament tornar hornir drin mei de haria. Aquera pasta que deu pausar…
Au cap d’ua òra estirar-la, dab un rotlèu de pastisseria, sus un plan de tribalh saupicat de haria dinc a que hasquia 2mm d’espessor. Estroçar en rectangles (10cm sus 4 o 5cm)

Cueita :
Har còser dehens ua fritura dinc a que sian juste dauradas. Esgotar e saupicar de sucre.

L’oliat de Maria-Loisa

Tà 4 o 5 personas :
Har còser ua cabòssa d’alh escrasada e duas cebas talhucadas hens ua coquèla pregona dab ua culhèra de grèish.
Tornejar tostemps tà que sie plan daurat.
Salar, peberar e hicar branon.
Trempar dab 2 litres d’aiga cauta e deishar un quart d’òra a huec doç.
A la fin bàter 3 blancs d’ueus e envià’us en tornejant.
Deishar dar dus borits.
Hicar los jaunes dens la sopièra de servir e varejar lo borion dessús en manejant