Abans la soa renavida, lo carnaval ne pertocava pas mei los adultes e qu’èra sovent redusit a la degustacion de quauquas crespèras. Au miélher, los parents que menavan la familha mascada, en eròis d’emission de television…, tà passar un vrèspe recreatiu.
Qu’avè perdut tota substància, tota fonccion. Desempuish la debuta, totas las equipas organizatriças qu’an obrat entà que los mainatges e los adolescents e tornèssen trobar lo sens de la hèsta. Tàd aquò, que’us calè sensibilizar a la soa significacion.
Lèu, qu’apareishó la necessitat de’us aportar ua informacion suu lor lòc d’escolarizacion. Qu’ei atau que vadó l’idea d’ua maleta pedagogica consacrada sonque au carnaval.

La maleta pedagogica

Tà tot public, que vedó lo dia en 1999. Tienut compte de la quantitat de la mestior qu’i trobam e deu son enriquiment constant, qu’ei uei ua vertadèra arca. Tots los documents que son bilingues.
Espleitada en fonccion de l’atge e de las competéncias deu public visat, aquera mestior que pòt servir de la mairau a l’universitat.
Que se’n pòden servir de mantuas faiçons : sia en partida segón los tèmas que perpausa, sia sancèra e que pòd alavetz alimentar las diferentas activitats d’ensenhament pendent dus mes.

Que permet de tornar a Carnaval la plaça soa de moment culturau màger luenh de la hèstas comerciaus. Que i a dens los País Occitans e mei que mei en Biarn, fonccions, un debanament, rites, personatges faiçonats per ua tradicion hòrta, qui s’explican peus aleàs de l’istòria, de las credenças, de las costumas. Qu’ei tanben ua hèsta vitèca dens laquau e vaden tot an navèths personatges, rebat d’ua societat dens laquau e vivem.

Qu’ajuda a çò que la preparacion e lo viscut d’aqueth moment privilegiat e sian lo parat d’exploracions pedagogicas navèras, diversificadas e enriquidoras tau mainat e tà l’educator.

Que permet tanben aus regents de perpausar activitats de classa : matematicas, lectura, expression escriuta e orau, activitats artisticas e d’expressions…

Objectius generaus

La soa tòca qu’ei de preparar aqueth moment hestiu en privilegiar la dimension culturau. Lo son contiengut validat per l’Inspeccion Academica qu’a com objectius :

Estar capable de’s dotar de referéncias culturaus pròpias a la region on vivem.
Estar capable d’enriquir lo son imaginari dal los mites e los eròis pirenencs.
Estar capable de compréner las diferentas fonccions sociauculturaus deu Carnaval.
Estar capable de víver un moment hòrt de la cultura populara biarnesa.

Activitats

Tà participar au carnaval, que cau préner consciéncia que la hèsta e’s prepara :

Que s’apren a confeccionar costumes e mascas en tot integrar las duas colors causidas per la classa.
musique
Que s’apren a fabricar instruments de musica segón diferents procediments en tot s’inspirar de la lectura de las ficas tecnicas : a bohar, a trucar, a segotir.
Que s’apren a utilizar lo son instrument de musica : tots los mainats que son musicians.
Que s’apren a concéver e realizar la monaca de Sent Pançard e tanben las cabòssas
Que s’apren a jogar un ròtle (teatre, mime..) en tot integrar la fonccion deu personatge causit, tradicionau o pas.
Que s’apren las cantas e las danças deu patrimòni culturau.
Que s’apren a exprimir oraument e per escriut ( o dessenh) çò qui ne va pas dens la vita, dens la vita soa. Tots aqueths chepics, a còps secrets, deus quaus acusam Sent Pançard, qu’acabaràn dens las es.hlamas deu lenhèr : d’aqueth moment enlà que seràn mensh pesucs a portar… e perqué ne s’envolarén pas en medish temps que las buas ?

Contiengut de la maleta pedagogica

1 liberet “Présentation de Carnaval”
1 liberet “Histoire de carnaval”

1 libe 50 paginas : “Carnaval Biarnés” Editions MonHélios
2 caishetas audiò : danças e sauts biarnés
1 caisheta videò “Danças biarnesas” e lo liberet d’explicacion
1caisheta de cançons “Papagais”

2 Instruments de musica : 2 canabèras, 1 brama topin
1 CD et 1 liberet “Histoires”
1 CD et 1 liberet “Jan de l’ors”
1 CD et 1 liberet “Minjachepics”
1 CD et 1 liberet “La nueit que’s minja lo dia”
1 CD et 1 liberet : instruments de musique gasconne
1 caisheta video “Personatges… ”
1 liberet “Explicacion deus personatges”

10 classaders “Personatges”

Afichas deus carnavals passats
15 grana afichas deus personatges (40cmx60cm)

Programas deus carnavals passats (2000,2001,…)
2 Costumes : 1 ors,1 Sent Pançard
1 classader : ideas navas

On se procurir aquera maleta ?

Las associacions, los comitats de las hèstas, los centres sociaus que s’adreçan directament au burèu de la nosta associacion.Le C.A.P.OC. (Centre d’animacion pedagogic en occitan) que gavida quinze maletas. Que son prestadas a gratís a las escòlas, collègis, licèus, establiments especialisats… Aqueth organisme que hè partida deu C.D.D.P. (Centre Despartementau de Documentacion Pedagogica).

CAPOC
3, av. Nitot
64000 Pau

Tél : 05 59 30 23 18

Carnaval de las escòlas

Lo carnaval deus mainats qu’ei un concentrat de tota l’istòria de Sent Pançard tau com la viven los adultes sus mantuns dias : dada de las claus de la vila, seguici hestiu, procès, senténcia, cremacion, “Adiu Praube Carnaval” e gran bal. Desempuish mantuas annadas, aquera animacion qu’ei organizada dab la collaboracion de l’AFPEJ ( Animacions Francas per l’Enfància e lo Joenèr ) e peus caminaires ( regents caminaires en occitan).Qu’ei sostienuda per l’Inspeccion Academica deus Pireneus Atlantics.