Com a l’acostumat, Sent Pançard qu’a escapat per prim au lenhèr deu Dimars Gras. Qu’ei partit esconè’s en Aragon. E, com cada an, los biarnés que’u van cercar entà har Carnaval. Lo son tornar, capvath vilas e vilatges, qu’apòrta alegria, rambalh, impertinéncia, fantasia e desconèra…
Sent Pançard n’arrèsta pas de’s hartar, de har la timpona, de córrer… e nosauts dab eth !

Las pausadas 2011

Propdanament …

La tradicion

Lo 6 de genèr, en Aragon, qu’ei « el dia de los Reyes » / Lo dia deus Reis. Qu’ei ua hèsta hèra importanta. Sent Pançard, rei deu carnaval, qui a escapat de chic a la mort, lo dia de Dimars Gras, que s’i ei refugiat. Rei pagan, descadut, en exili, que profièita deu parat, dens los dias qui segueishen aquera hèsta, entà tornar paréisher publicament, dab la fèrma intencion de tornar conquesir la corona soa.

Peu Sompòrt, que torna en Biarn, en s’estancant dens mantuas vilas e vilatges. Arrecebut en grana pompa, qu’ei, a cada pausada, ua hèsta ritualizada (danças, ceremonia d’arcuelh en biarnés, hartèra, musica). Que torna trobar membres de la soa cort qui’s junhen a la soa marcha triomfau. Lo son tornar que s’espandesih sus quasí un mes entà s’acabar lo dissabte abans la setmana de carnaval : qu’ei la Pantalonada.

Aquera virada en Aragon e dens lo Biarn sancèr que permet d’associar e d’enrasigar lo Carnaval Biarnés e de har-ne ua hèsta comunautari federativa.