Divés 17 de Heurèr de 2012
- 20h00 : Degustacion de vin blanc
- 21h00 : Hartèra / Repaish pantagruelic
- 22h00 : Gran bal dab lo grop IBILIZ
Lo pòrc, en Bearn, qu’ei hèra present sus las taulas. Las pelèras qu’i son enqüèra hèra nombrosas e que dan lo parat de har grans repaishs conviviaus e consequents. A nueit, lo repaish imaginat que será com ua replica gigantassa de las agapas de fin de pelèra, dab las loas istoèras, las loas cançons e la loa musica. A d’aqueth parat, que’vs será proposat pòrc dens tots los estats. Aqueth repaish tradicionau e tipic deu Bearn que será especiaument torrinat per l’equipa de l’aprestaire LHOSPITAL.
Entà reservar los vòstes repaishs, arren de mei simple ! Que cau sonque completar los formularis :
o que podetz tanben telefonar au burèu de l’associacion Carnaval Pantalonada au 05 59 30 76 48
Lo menut 2012
Garbura Biarnesa
Garròt BrasejatCrostejat Daufinés
Hromatge d’Aulha
Pastís d’Amelia, Crèma Anglesa
Cafè e Veire de Vin
Menut a 18 €
Menut mainats / Menut mainats (dinc a 12 ans)
Puç
Confit de Guit
Crostejat Daufinés
Pastís d’Amelia, Crèma Anglesa
Menut a 10 €
La tradicion
En Biarn los dus patrons deu carnaval que son Sent Pançard e Sent Porquin. Aquò qu’amuisha plan la plaça deu pòrc dens lo còr deus biarnés. Parièr com un pè de nas a la religion qui non vòu pas qu’aqueth dia e s’i minje carn, la serada en l’aunor deu pòrc qu’a lòc lo divés, dia deu peish. Qu’ei aquò carnaval : la transgression per l’inversion.
La tempora de Carnaval en Biarn que s’esten deu 1èr dimenge de l’annada quiò lo dimèrcs cierrós. Qu’ei l’epòca de las pelèras. Taus biarnés qu’ei ua hèsta hèra importanta, telaments importanta qu’an baptiat aqueth eveniment : la Sent Porquin.
Parièr com tà la hèsta annau, qu’invitan vesins e parents.
Perqué aquera importància
En Biarn, non n’i a pas hèra enqüèra , har viéner un pòrc qu’amuishava l’estat de fortuna de las familhas e las qui ne s’ac poden pas perméter qu’èran chic consideradas. Qu’èra un signe d’aisidèr o de grana praubetat.
Lo pòrc que vivè cantèr de l’ostau, dens ua petita bastissa senhorada per un poralhèr. Qu’acompanhava la vita quotidiana deu monde e que devienè quasiment un interlocutor au quau e podem parlar, qui responè e qui ahupava… Frut de totas las atencions, sustot femininas – que son las hemnas qui’u neureishen- aqueth personatge, unic dens la bòrda, qu’èra hèra arrespectat, a tau punt qu’èra sovent subernommat : lo Ministre, lo Nòble, lo Monsur, lo Deputat…
Objecte d’ua vertadèra veneracion, n’ei pas estonant, los Biarnés que l’ajan assimilat a un Sent, d’autant mei que la preséncia soa èra vitau tà l’economia familiau e sinonima d’abonda e de hartèra.
La pelèra
Qu’ei atau que’s parla deu dia quan tuam lo pòrc. Qu’ei ua tradicion hèra vielha en Biarn. Esculpturas deu portau de la catedrau Senta Maria d’Auloron (Xllème) que l’atèstan. Que tuavan en lua vielha, sustot las guihas, tà que la carn e’s consèrve. N’escanavan pas lo pòrc, que’u sangnavan dab la ganiveta, cotèth dab ua lama longa e fina, reservada exclusivament ad ‘aqueth usatge. Aqueth eveniment que’s debanava en seguint d’un rituau hèra precís on los òmis e las hemnas qu’avèn cadun lo lor ròtle.
A maugrat de las reglementacions multiplas e constrenhentas, aquera tradicion que resista e que sembla trobar un retorn d’interèst auprès de consumidors de bona hartèra…
E com dens lo biton tot qu’ei bon, viva la ganiveta… !
L’òmi e lo pòrc
Lo pòrc que simbolisa lo glapautèr e lo goludèr. Que minja tot cò qui tròba. Pendent carnaval, e mei enqüèra pendent la setmana grassa, lo òmis, quan se desbraguetan, que’s compòrtan com pòrcs, que clacan e que beven shens retienguda nada.
Lo pòrc que simbolisa tanben la luxura , la recèrca deus plasers de l’amor fisic. Minjar pòrc en quantitatb qu’èra lo pròpi deus qui vivèn sensuaument.
Simbolica deu Pòrc
L’animau que representa au còp l’impuretat e lo sacrat : l’impuretat pr’amor qu’ei censat despuish l’antiquitat e aquò dinca l’atge miejancèr, har córrer la lèpra. Que disen d’eth qu’ei ladre, qu’ei a díser que pòrta larvas de tènia dens los sons muscles e mei particularament devath de la lenga. Que pren plaser dens la hanga e lo hems, tà’s rafresquir.
Lo sacrat pr’amor qu’ei l’animau fetiche de Sent antòni, lo Sent patron deus porcatèrs.
